2019

Måndag 1. juli

Ikkje så mange på dugnad i kveld, ymse forefallande arbeid vart gjort.  I Heishuset vart det hengt opp nokre nye bilete, mellom anna teikningar VfG fekk frå Tjødnalio skule som takk for godt samarbeid i den lokalhistoriske veka då heile skulen var på omvising hjå venelaget. Lynavleiaren på Sjakttårnet har ei tid vore ute av bruk då det ikkje har vore jording. Måndag vart jordinga i første omgang gjort mellombels.

Torbjørn Marthinsen og Thor Hauglid koplar lynavleiaren på Sjakttårnet mellombels til jord. Foto: Tor Resser ©

Med dette tek dugnadsgjengen fri i fire veker, fram til måndag 5. august då det er «på «an igjen» . Hausten byrjar faktisk med grillfest, ei litt for sein avslutning på vårsemesteret.

God sommar til dykk som følgjer Venelaget for Gruo på heimesidene.

Tysdag 11. juni

Det meste av dugnade tysdag handla om gras og slått, men òg litt maling. Ferdigmaling av rekkverket langs vegen til Sjakttårnet, og maling av Stigerkontoret. Torbjørn Marthinsen tok langorvet på slipesteinen og kvesste det. Rune Marcussen ymta frampå om at å slå gras med hjå og særleg langorv hadde han aldri freista og lurte på om det var vanskeleg. Han fekk eit lynkurs av han som verkeleg kan kunsten, Torbjørn Marthinsen. Marcussen tok utfordringa på strak arm og svingde langorvet resten av kvelden.

Torbjørn Marthinsen sliper ljåbladet på langorven.

Rune Marcussen med god svung på langorven.

Thor Hauglid er eksperten med plenklipparen. Alle bileta foto Tor Resser ©

Torsdag 6. juni

Kulturkveld ved Tjødnalio skule torsdag. Litt på sida å trekkja det inn i Venelaget for Gruo sine heimesider? I grunnen ikkje. Kulturkvelden dreidde seg om A/S Stordø Kisgruber og samfunnet i gruo. Dette hadde skulen, elvar og lærarar, arbeidde lenge, godt og seriøst med. Ikkje berre hadde lærarane vore på synfaring/omvising til gruvene i Rossneset der det heile byrja på 1860-talet. Alle dei godt 200 elevane ved skulen hadde over fire dagar vore på omvising hjå Venelaget for Gruo i mai månad.

Den siste veka før kulturkvelden hadde elevar og lærara nytta til å laga utstillingar, teikningar, tekstar, animasjonsfilm og verkeleg film frå gruveområdet der elevar spelte ulike roller. Kulturkvelden byrja på utescenen, i ausande regn. Det hinda ikkje at foreldre, føresette, beteforeldre, onklar, tantar og mange andre i hundretal hadde funne vegen til Tjødnalio. Korkje lærarar eller elevar lot eg merka av regnet, det var dans, song og eit fantastisk kor. Vonar gitarane var laga av vassfast finèr? Venelaget for Gruo takkar Tjødnalio skule for at dei på denne måten sette lys på det unike anlegget som ligg i nærmiljøet.

Regnet hølja ned under framsyninga på utescenen.

Tverrsnitt av fjellet med solane (etasjane) markert med folk i arbeid, med hjelm og lys. I midten heiskorga.

Bustader var teikna både for arbeidarar (biletet) og for dei høgare på rangstigen. I byrjinga var det klasseskilje i gruo.

Til og med gruvegang var det laga med to figura, til høger, som det er i gruo. Og masse flaggermus i taket, i motsetnad til i gruo der me berre veit om ein eller to som er å sjå no og då. Alle bileta foto Tor Resser ©

Måndag 3. juni

Bra vêr til utearbeid. Rekkverket langs vegen til Sjakttårnet vart malt svart, så langt malinga rakk. Det vart støypt kring festepunkta til bøylene. Frå plata ved tårnet mot fjellveggen skal det sikrast betre, gjerdet som ein gong var, er stort sett borte, nytt skal koma opp. Stigerkontoret skal få seg ny, etterlengta maling.

Knut Inge Øien Hovin dreiv med svartmaling, av rekkverket langs vegen til Sjakttårnet. Bak støyper Ivar J. Helleland kring bøylefoten.

Sven Lindseth borer hòl for nye gjerdestolpar mellom plattinga ved tårnet til fjellveggen. Staden er bratt og han nyttar sikringsele. Båe bileta foto Tor Resser ©

Torsdag 30. mai

Kristi himmelfartsdag hadde Stord og Nysæter kyrkjer gått saman om  sams friluftsgudsteneste og familiedag i parken i Gruo på Litlabø. No spelte ikkje vèrgudane på lag med kyrkja denne dagen då det vart regn om føremiddagen. Difor vart gudstenesta flytta innomhus til Heishuset. Der vart det fullt hus, ein stad kring 100 personar, som høyrde prestane Jørgen Knutsen og Olav J. Oma forretta.

Heishuset var fullt, og vel så det, til gudstenesta Kristi himmelfartsdag.

Etter gudstenesta var det ei kort matøkt, skulle vore grilling, i staden vart det pølser i lompe eller brød. 47 melde seg på til vandring i Høgåsen gruve delt på to grupper. For borna var det laga rebusløype utomhus

Torbjørn Marthinsen, i orange jakke og blå kjeledress til høgre, frå Venelaget for Gruo var omvisar for den eine gruppa. Her fortel han om Sjakttårnet.

Ivar J. Helleland frå Venelaget for Gruo, i blå/raud kjeledress til høgre, var omvisar for den andre gruppa. Her i den store hallen i Høgåsen gruve. Alle bileta foto Tor Resser ©

Gudstensta og omvisinga var så vellukka at det alt no vart snakka frampå om å koma att neste år. Då voneleg med godt vèr , i friluft i parken.

Måndag 27. mai

Travelt måndag. I den store hallen i Høgåsen vart utslitne pallar skifta med nye, ny netting vart lagt på rampen opp til platinga og diverse lysrøyr og -pærer vart skifta der det var trong for det. Ute i dagen vart trea som vart tekne ned i Kiselva, skorne opp, greinene samla og lagt i haug for seinare å verta brent. Plenområdet vart klipt med ny plenklippar. Vidare vart det rydda langs vegen til Sjakktårent og arbeidet med å mala rekkverket langs vegen byrja så smått.

Måndag 20. mai

Full aktivitet måndag. Langs Kiselvo heldt rydding av tre fram, elva mellom brua ved Snikkarverkstaden og brua ved parken er rydda, mest bjørk.

Torbjørn Martinsen på botn av Kiselva, vasstanden er svært låg etter lang periode utan nedbør, førte motorsaga då trea vart tekne bort.

Trea vart trekt opp over muren, her ved Thor Hauglid og Rune Johannessen

Arbeidet med lokomotivet Blåmann vart fullført måndag, All dårleg hydraulikkolje vart tappa, oljefilter skifta og ny olje fylt i tanken. Prøvekøyring vart gjennomført utan problem.

Rune Marcussen prøvekøyrer lokomotovet Blåmann . Med seg i arbeidet hadde han Knut Ekse og delvis Knut Inge Øien Hovin.

Sven Lindseth gjorde seg ferdig med sveise/slipearbeidet på rekkverket langs vegen til Sjakttårnet. Slipepunkta vart forsegla for å hindra rust. Rekkverket skal malast svart, eit arbeid Lindseth sjølv ville ta seg av  for, som han sa, – eg er så god å svartmala…… Med seg måndag hadde han Ivar J. Helleland som støypte kring  stolpane.

Måndag gjorde Sven Lindseth seg ferdig med sveise/slipearbeidet på rekkverket,. Alle bileta foto Tor Resser ©

Så skal me ikkje gløyma damene våre som både fører rekneskap, steiker lappar eller vaskar anten der er i Heishuset eller i Stigerkontoret.

 

Onsdag 15. mai

Solid avsporing med toget onsdag morgon. Toget var på sporet frå lokstallen til Gruva stasjon der det skulle henta elevane frå Langeland skule og køyra dei inn i fjellet. Årsaka til avsporinga var truleg at pensen som pensar sporet ned mot Gruo stasjon hadde ei lita opning på sporet til under tårnet. Dermed tok den bakarste vogna retning under tårnet medan den mittarste vogna ville mot Gruo stasjon, dermed skar det seg. Bakarste vogna vart løyst frå, mittarste vogna vart lirka på sporet med spett. Bakarste vogna måtte jekkast opp slik at hjula kom høgare enn sporet og drege i rett stilling. Sporet var klart til elevane skulle inn i fjellet og pensen vart passert utan uhell.

Den bakarste vogna tok feil spor grunna ei lita glipe i pensen. Foto Tor Resser ©

Måndag 13. mai

Vedlikehaldet av lokomotivet Blåmann held fram. Det tek tid å skifta olje og-filter. Eit arbeid det syner seg ikkje har vore prioritert på lang tid. Det skal leggjast opp rutinar for dette arbeidet framover. Taket på Stigerkontoret  vart freista reinska for mose. Det mest vart fjerna, men mosen sit godt og er ikkje like lett å få bort alle stader.

Rune Johannessen var mellom dei som reinska mose frå taket på Stigerkontoret. Foto Tor Resser ©

I Kiselva, langs vegen frå Snikkarverkstaden mot Stigerkontoret, har det gjennom åra vakse opp ein god del tre, mest bjørk men òg andre treslag. Måndag vart ein stor del av trea tekne ned, resten vert teke komande måndag.

 

Måndag 6. mai

Lokomotivet Blåmann er sett på bukk for overhaling. Mellom anna skal det skiftast oljer og -filter. Slark i drivkjede og bremser skal justerast. Den gamle luftkompressoren skal få ei overhaling. M.a. må oljefilter skiftast, dei som sto og vart tekne ut måndag, har tydelegvis ikkje vore skifta på nokre år….. I Heishuset vart det rydda og vaska golv etter 1. mai. Heishuset kjem til å verta nytta flittig utetter i mai månad.  Den doble porten til lokstallen vart endeleg malt. På rekkverket langs vegen til Sjakttårnet vart utsette sveiingar styrkt.

Geir Magne Hamnes malar den ein halvdelen av porten til lokstallen.

Godt brukte oljefilter frå luftkompressoren. Båe bileta foto Tor Resser ©

Onsadg 1. mai

Tradisjonen tru bad Venelaget for Gruo inn til open dag 1. mai. Og publikum følgde opp. Aktivitetane var dei gode gamle; omvising i stollane, i Sjaktårnet, i smio, i arbeidarbustaden. Svært populært var det med togkøyring inn i stoll Høgåsen. For born var det ballkast på boksar og freista gå på stylter. Seniororkester under leiing av Norvald Nilsen stilte opp også i år, noko publikum sette stor pris på. Kafeen i Heishuset hadde stor pågang, damene arbeidde på spreng, gjekk til slutt tom for vaflar og måtte spe på med lappar. Det fiksa dei på strak arm. I arbeidarbustaden og smio veksla Johannes Vetås og Svein J. Koppang på å vera forteljarar.                                          

Hektisk i kafeen i Heishuset.

Å gå på stylter var populært, men ikkje alltid like lett å finna balansen.

Seniororkestert under leiing av Norvald Nilsen til høgre. På slagverk til venstre Olav Skorpen som i år kan markera 60 år som musikar.

Thor Hauglid, i blå kjeledress, var omvisar i Sjakttårnet. Han fekk klatra trappene til topps mange gonger.

Omvisarar i stollane var Torbjørn Marthinsen, Wilfred Sætre og på biletet Ivar J. Helleland, i den store hallen i Sadalen gruve. I bakgrunnen til høgre Sigmund Loretntsen og Geir Magne Hamnes som sikringar bak gruppa.

Togkøyring inn i fjellet er svært populært og det er trongt ved Gruo stasjon ved av og påstiging. Lokførar var Rune Marcussen til høgre med kvit hjelm. Alle bileta foto Tor Resser ©

Kor mange som vitja VfG onsdag er vanskeleg å svara på då det er fritt tilgjenge til området. Det vart selt til saman 1142 billettar, delt med 150 på omvising i stollane, 282 omvising i Sjakttårnet og 710 togkøyring. Talet her er høgare då born som kunne sitja på fanget, ikkje løyste billett.  Ein stad kring 1500 personar var nok i Gruo 1. mai i år. Det skal òg nemnast at det var ein togtur med handikapvogna og rullestol inn i Høgåsen.

Tippetevlinga om kor tungt fenalåret var, vart vunne av Maria Groot Hjøllo. Fenalåret var 2,002 kg, fire hadde tippa 2,0 kg og av desse vart altså Hjøllo trekt ut som vinnar.

Søndag 28. april

Søndag var det konsert med Jack Vreeswijk  og Love Tholin i Heishuset. Før konserten var det tid til omvising i både Sadalen og Høgåsen gruver med Ivar J. Helleland soim omvisar. Gjestene var interesert og imponert over kva dei fekk sjå og høyra.

Ivar J. Helleland fortel Jack Vreeswijk i midten og Love Tholin om den store hallen i Sadalen ruve.

Til konserten om kvelden var det kring 80 frammøtte. Dei fekk ei hyggjeleg halvannan time med viser og forteljingar både om Jack Vreeswijk, faren Cornelis og andre.  Jack er ein framifrå fortelja og musikar og fekk fram låtten og smilet rett som det var.  Han avslutta med En natt jag drømde og fekk publikum med seg på  meir eller minder allsong. Takk for ei hyggjeleg stund.

Jack Vreeswijk og Love Tholin i Heishuset. Båe bileta foto Tor Resser ©

Laurdag 27. april

Torbjørn Marthinsen og Ivar J. Helleland fekk seg eit par tre timar laurdgsarbeid med å tetta hòlet som var grove under porten til portalen Høgåsen. Det synte seg at det hadde vore nokon inne i gruvegangen. Truleg er det knust ein eller fleire gamle lyskuplar(lyspærer). Denne gongen vart hòlet tetta med steinar støypte fast og kamstål slege langt ned i bakken.  På andre sida, mellom skjenegangen og portalveggen, vart det òg slege ned kamstål.

Torbjørn Marthinsen slår ned i bakken den første av tre kamstål gjennom steinen.

På båe sider av steinen med kamstål vart det støypt fast store steinar. Ivar J. Helleland plasserer den inste steinen i mørtelen.

Ivar J. Helleland jamnar området med grus. Alle bileta foto Tor Resser ©

Torsdag 25. april

Endå ein gong har uvedkomande freista ta seg inn i Høgåsen gruvegang. Hendinga må ha skjedd mellom søndag og torsdag. Denne gongen er det grove under porten på eine sida. Om nokon har klart å ta seg inn gjennom hòlet er uvisst. I tilfelle må den eller dei vortne skitne. Venelaget har sagt det før og tek oppatt , der er farleg for ukjende å ta seg inn i gruvegangane. Tek dei seg over sperringar som er sette opp og fell ned i ei ort, er det ikkje sjanse å koma opp att. Der er fall på godt 10 meter før dei treff vassflata.

Det er grove hòl under proten for å ta seg inn i Høgåsen gruve. Foto: Tor Resser ©

Tysdag 23. april

Den gule personvogna til toget fekk det siste strøket med maling tysdag. Då er togsettet, med nye vogner, klart til å køyra publikum inn i fjellet på den opne dagen 1. mai. Dei nye vognene er lettare å ta seg inn i og ut frå, taket er løfta på langsidene slik at det vert betre å sitja med rak rygg.

Nye og nymalte personvogner klare til bruk 1. mai.

Elles tysdag, 3. påskedag, var rydding på dagsorden, særleg i området ved Sjakttårnet. Personplanen for 1. mai vart sett opp, kvar og ein har fått sine oppdrag for å losa dagen vel i hamn.

Området ved Sjakttårnet var rydda. Ved hengaren Torbjørn Marthinsen og Ivar J. Helleland til høgre. I bakgrunnen til høgre ved Sjakttårnet, Sven Lindseth. Båe bileta foto Tor Resser ©

Vreeswijk-konserten

Tysdag opplyste Ole Johnny Almås at det til då var selt 45 billettar til Jack Vreeswijk-konserten sundag. Almås gjer merksam på at dei som ønskjer å kjøpa billett på førehand, og vegrar seg for å gå på internett, kan kjøpa billett ved å ringja 93025417 . Det vert òg høve til å kjøpa billett ved inngangen til Heishuset frå kl. 1830. Konserten byrjar klokk 1900.

Måndag 15. april

Dugnaden måndag var mykje maling. Gunnar Almås la siste hand på malinga av Gruo stasjon. Vart dermed klar til å ta i mot publikum på open dag 1. mai.

Gunnar Almås måtte på rygg for å koma til dei vanskeleg stadene under benken på Gruo stasjon.

Wilfred Sætre var ferdig med å byggja om den tredje av personvognene til toget. Den raude vogna vart malt andre strøket, medan den gule fekk først strøket. Dermed vert alle vognene ferdig til køyring 1. mai.

Wilfred Sætre til høgre, i amtale med Ivar J. Helleland, har gjort eit kjempearbeid med å byggja om personvognenen til toget.

Knut Inge Øien Hovin er med på å gje den gule vogna det første malingsstrøket. Alle bileta foto Tor Resser ©

I gruvegangane vart utsliten lysarmatur skifta med nye. Rydding på uteområdet, særleg i parken, haldt fram. Då det nærmar seg 1. mai, vart status for kven og kor mange som kan vera med VfG å ro Open dag vel i hamn. Laget treng så mange som mogeleg til å vera med å dra lasset. Kan du gje ei hand, melder du deg i gruo tysdag 23. april kl. 1800. Damene i kafeen set stor pris på om nokon kan baka ei kake (eller to) å etla til venelaget. 

Tysdag 9. april

Leiar i VfG, Torbjørn Marthinsen, ba inn til vandring på Rossneset, der gruvedrifta byrja midt på 1860-talet. Seks av dugnadsgjengen var med på vandringa der Marthinsen, som har lese seg kraftig opp på soga til gruvene, og Ivar J. Helleland som vaks opp på øvre Litlabø (Gjerde), var forteljarar. Turen gjekk gjennom eit landskap som er planta til med gran. Delar av området er vanskeleg å ta seg fram i grunna mykje vindfall, særleg etter orkanen Nina. Området er ikkje rydda. Vendepunkt for turen var på ein rasteplass ytst på Rossneset. Ein interessant tur i nydeleg vèr.

Ved inngangen til den eine gruva på Rossneset. Foto Tor Resser ©

Måndag 8. april

Mykje av arbeidet måndag var framhald av arbeid dei sisre vekene. Gjerde langs vegen til Sjakttårnet er ferdig oppsett med bøyler. Att står arrondering. Rampen til toalettbrakka vart ferdigmontert. Arbeidet med ombygginga av den tredje og siste personvogna til togsettet går mot slutten, den andre vogna fekk første strøket raudmaling. Ved vart pakka i sekker. I parken vart treet ferdig stussa.

Rekneskapsdamene, Britt Furre til venstre og Ingvild Skaret Sortland, kan meir enn å handtera tal, Dei gav treet i parken ny «frisyre». Foto Tor Resser ©

Måndag 1. april

Tilkomstrampen til toalettbrakka vart sett attende måndag. Dels med truck dels med rå handemakt. Vatn og avløp er kopla, det same med lys, bortsett frå i gangen. Toalettet kan dermed brukast.

Finjusteringa av tilkomstrampen vart gjort med rå handemakt.Frå venstre Geir Magne Hamnes, Rune Marcussen og Knut Inge Øien Hovin.

Toalettbrakke og tilkomstrampe klar til bruk.

Den andre personvogna er ferdig ombygt. Langs sporet i stoll Høgåsen er det ved tre-fire punkt på luftrøyret som heng langs veggen, vorte for trongt med den nye takkonstruksjonen på vognene. Røyret måtte trekkjast litt lenger frå sporet på desse punkta. Feste vart bora i fjellet, kjetting og strekkfisk vart monter mellom luftrøyr og festepungt og røyret trekt dei turvande centimetrane frå sporet slik at vognene kjem forbi.

Kjetting og strekkfisk skal trekkja luftrøyret nærare fjellet, mot høgre, og gje betre plass til peronvognene. Torbjørn Marthinsen til venstre festar kjettingen til luftrøyret. Til høgre Ivar J. Helleland.

 

Ikkje alltid like lett med store fingrar og små mutrar. To mutrar gjekk i rennesteinen, men vart funne att. Ivar J. Helleland til venstre og Torbjørn Marthinsen. Alle bileat foto Tor Resser ©

Langs vegen til Sjakttårnet held arbeidet med rekkverket fram. Arbeidet med ombygginga av den tredje personvogna er kome godt i gang.

Vreeswijk-konserten

Billettane til visekvelden med den svenske trubaduren Jack Vreeswijk er lagt ut for sal. Konserten byrjar i Heishuset sundag 28. april  kl 1900 . Billettar, kr. 325,oo, kan kjøpast på denne linken.

Tilskipar Ole Johnny Almås fortel at salet går bra, vil du på konserten må du sikra deg billett snarast.

Måndag 25. mars

Måndag vart toalettbrakka flytta til mellombels stad til nytt toalett er kome bygt. Flyttinga gjekk kjapt. Richard stilte med kranbil  og heile operasjonen gjekk på mindre enn ein time.

Brakka er trekt ut og vert svinga rundt hjørnet på Heishuset.

Steinane brakka sto på vert omplassert til ny stad før brakka vert sett ned.

Toalettbrakka trygt plassert på ny stad inn til vidare. Alle bileta foto Tor Resser ©

Før toalett kan takast ibruk må vatn, avløp og straum koplast til. Tilkomstrampen skal setjast attende.

Elles måndag heldt arbeidet med høgdejustering av rekkverket langs vegen til Sjakttårnet fram. Det same med arbeidet på personvognene på toget. Andre vogna er straks ferdig til å verta malt.

Frå Svein Jonassen har Venelaget for Gruo fått eit historisk interessant bilete. Det syner commandotroppen som raida gruveanlegget 23. januar 2943. Biletet skal han ha fått frå familien til commandosoldaten, nr. to frå venstre, som miste livet ved raidet.

Måndag 18. mars

Langs vegen til Sjakttårnet vart det drive høgdejustering på rekkverket for å få meir rette høgder på bøylen i høve til kvar andre. I parken vart eit tre som hadde vakse vilt i «hytt og ver» i mange år klypt. Kva type tre det er tale om er litt uvisst.

Sven Lindseth nærast og Rune Johannessen driv høgdejustering av rekkverket langs vegen til Sjakttårnet.

Torbjørn Marthinsen klypper og tynnar eit tre i parken.

Wilfred Sætre og Knut Inge Øien Hovin panelte ei langside og ei kortside på den andre togvogna.

VfG har i lengre tid drøfta nytt toalettanlegg, Brakka som er toalett i dag er meir enn mogen får å verta pensjonert. No er arbeidet så smått byrja med å byggja nytt. Måndag vart tilkomstrampen til toalettbrakka fjerna. Neste steg vert å flytta brakka med å snu ho 90 grader og setja ho opp  frå hjørnet av Heishuset mot inngangstrappa. Men først må det setjast opp nye fundament til å setja brakka på. Det arbeidet byrjar måndag slik at brakka vert flytta snarast mogeleg og vera ferdig til bruk seinast innan 1. mai.

Rune Marcussen losnar rampen frå brakka.

Rampen vert flytta med truck’en. Brakka vert snudd 90 grader og plassert langs Heishuset frå hjørnet til venstre i biletet mot inngangstrappa. Alle bileta foto Tor Resser ©

Det nye toalettanlegget vert bygt der brakka sto, men trekt lenger bak slik at det vert mindre synleg. Planen er at venelaget skal gjera brorparten av arbeidet.

Måndag 11. mars

Etter at arbeidet med oppgradering av underbygga i Høgåsen gruve er ferdig, er neste steg i gruva å leggja spor inn mot raset. Det kan dreia seg om kring 50 meter. Måndag vart restane av eit gamalt spor fjerna, gangen ligg open for svilleleging. Det er så langt ikkje avgjort kva tid det vert.

Torbjørn Marthinsen i bakgrunnen og Thor Hauglid losnar ein del av den gamle skjenegangen i Høgåsen. Bak Marthinsen skjenegangen så langt han er komen til no.

Ivar J. Helleand slår laus ein spiker (dog) som endå held skjena til svilla. I midten Torbjørn Marthinsen, med spettet Thor Hauglid.

Når sporet er ferdig inn mot raset syslar VfG med ein kombinert tog/fottur i gruvegangane. Tog til endes av sporet og vidare fottur ut at på «baksida» av gruvegangen til den store hallen i Høgåsen. Der vil deltakarane mellom anna koma framom nokre svære steinmurar, bygde truleg ein gong på 1930-talet.

Iva Helleland med nokre av dei store steinmurane. Det er dimensjonar på steinen som er nytta. Alle bileta foto Tor Resser ©

I lokstallen arbeidde Wilfred Sætre vidare med oppgradering av andre vogna.  Ansgar Vedå heldt fram å mala den blå vogna. I Heishuset sette Rune Marcussen og Knut Inge Øien Hovin opp hylle som damene skal nytta til lager. Så lenge det var dagslys heldt Sven Lindseth, Rune Johannessen og Gunnar Almås  fram arbeidet med gjerde langs vegen til Sjakttårnet.

Måndag 4. mars

Årsmøtet vart avvikla på vanleg vis med årsmelding (visuell på storskjerm ), årsrekneskap ved kasserar Åsta Lorentsen. Rekneskapen synte eit overskot på 84.401 kroner. Årsaka til det gode overskotet er gode inntekter frå open dag 1. mai og basaren i oktober.  Leiar Torbjørn Marthinsen ønskte dei 20 frammøtta velkomne og Ivar J. Helleland vart valt til møteleiar, Svein Jæger Koppang til skrivar. Ved vala vart sitjande leiar valt for eitt år til. Leiar skal veljast kvart år. Styremedlem Rune Marcussen vart attvald, det same var varamedlemene Britt Furre og Knut Inge Øien Hovin.  Åsta Lorentsen og Thor Hauglid sto ikkje på val i år. Rekneskapsførarane Ingvild Skaret Sortland og Britt Furre held fram.

20 medlemer av VfG møtte fram på årsmøtet. Dei fleste frå dugnadsgjengen.

Kasserar Åsta Lorentsen la fram rekneskapen, synt på storskjerm. Båe bileta foto Tor Resser ©

For første gong  gav venelaget ut sin eigen eldsjelpris. Prisen gjekk i år til Tor Resser for arbeidet han har lagt ned med å dokumentera i bilete og video arbeidet VfG driv.

Ole Johnny Almås stadfesta måndag at det vert visekveld i Heishuset sundag 28. april. Han har fått den svenske trubaduren Jack Vreeswijk til Stord og Gruven.  Konserten vert på ettermiddagstid.

 

Måndag 25. februar

Litt av kvart å hengja fingaren i måndag. Like innanfor portalen til Høgåsen gruve vart det lagt på noko meir grus der det samla seg vatn når det regnar.

Meir grus i gruvegangen der det samla seg vatn. Torbjørn Marthinsen svingar spaden med grus medan Rune Johannessen, i bakgrunnen, grev fram grus i vogna.

Lenger inne i same gruvegang vart sikringa av underbygget ferdigstilt. To støttestolpar vart sette opp under langdragaren på eine sida. Stolpane vart sikra både i topp og botn med dogs (spesialspiker som vert nytta til å festa skjena til svilla).

Torbjørn Marthinsen bore hòl for dogsen.

Rune Johannessen kliner til dogsen. Tungt å slå «i motbakke».

I lokstallen byrja arbeidet med å byggja om den andre (raude) personvogna. I første omgang vart gitter fjerna før arbeidet med å setja opp spikerslag kunne ta til. På vogna som er ferdig bygt om, byrja arbeidet med å mala panelet.

Fredrik Bjørnberg losnar gitteret på vogna for å ta det bort.

Ansgar Vedå er så smått byrja å mala vogna som er ferdig. Alle bileta foto Tor Resser ©

Heishuset vart rydda og golvet vaska klart for årsmøtet komande måndag. Skrivne medlemer har fått årsmelding tilsendt, møt opp.

Måndag 18. februar

Arbeidet med å sikra underbygget i Høgåsen gruve held fram. Måndag vart den andre langdragaren heist opp og sikra med tre gjennomgåande boltar. I tillegg vart ein av tre støttestolpar sett opp. Dei to andre vert sette opp komande måndag.

Torbjørn Marthinsen borer hol for festebolt. Ivar J. Helleland og Rune Johannessen følgjer med.

Ivar J. Helleland festar stoppskive og entrar mutter på bolten medan Thor Hauglid, med ryggen til, held bolten fast. Til venstre Torbjørn Marthinsen.

Støttestolpen vert sett under langdragaren. Rune Johannessen til venstre og Ivar J. Helleland.

Rune Johannessen kuttar bolten. Alle bileta foto Tor Resser ©

Wilfred Sætre og Knut Inge Øien Hovin vart så godt som ferdig med ombygginga av den første av dei tre togvognene. Malararbeidet, vogna vert blå, vert gjort litt etter kvart.

Måndag 11. februar

Arbeidet med rehabiliteringa av togvognene held fram. Sidene har fått panel, måndag vart taket lagt. Att står paneling over opningane i kvar ende av vogna. Til slutt vert taket tekt. Når dette arbeidet er ferdig, skal vogna malast.

Wilfred Sætre skjer til panel som skal setjast mellom taket og opninga på kortsida av vogna.

Knut Inge Øien Hovin prøvesit vogna og syner det er mykje betre plass når taket er heva. Inngangen er òg betre.

I Høgåsen gruve vart det sett opp tre stolpar under dragaren, ein i kvar ende og ein på midten, som vart montertpå underbygget  førre måndag. Neste steg vert å få opp langsgåande dragar på motsett side av underbygget.

Tre stolpar er sett opp under den langsgåande dragaren som vart montert førre måndag. Alle bileta foto Tor Resser ©

Tysdag 5. februar

Tysdag kom seniorrådgjevar Astrid Dale frå Mattilsynet for å sjå på og godkjenna det «nye» kjøkenet i Heishuset. Ho vart motteken av leiar i Venelaget for Gruo, Torbjørn Marthinsen.  -Stor endring sidan sist eg var her, det er jo mange år sidan. Flis på golvet òg, sa Dale då ho vart vist inn. Særlege merknader hadde ho ikkje og godkjende kjøkenet til sin bruk. Ho sender skriftleg rapport til VfG etter synfaringa.

Seniorrådgjevar Astrid Dale frå Mattilsynet på synfaring i kjøkenet saman med leiar av VfG Torbjørn Marthinsen. Foto Tor Resser ©

Vil du sjå fleire bilete frå «det nye kjøkenet» vert dei å sjå i den visuelle årsmeldinga på årsmøtet 4. mars

Måndag 4. februar

Måndag var det full fart i gruvegangen i Høgåsen med å rehabilitera underbygget. Den første langdragaren på kring 5 meter vart heist opp og sikra mellombels. Stolpen vart heist opp med talje i kvar ende. Gjennomgåande hòl vart bora og bolt festa.

Rune Maecussen heiser opp eine enden av stolpen, Sven Lindseth til høgre.

Rune Marcussen og Rune Johannessen sikrar stolpen.

Rune Marcussen borer hòl gjennom stolpen og dragaren over.

Bolten er festa på oversida og Ivar J. Helleland snurrar mutter på bolten på undersida for å festa stolpen. Alle bileta foto Tor Resser ©

I lokstallen held arbeidet fram med å panela togvognene. I Stigerkontoret var det full fart med å klargjera årsmelding og giro for innbetaling av medlemspengar før dei vert sendt ut til skrivne medlemer. Årsmøtet vert 4. mars klokka 1800 i Heishuset.

Måndag 28. januar

Så kom snøen til Gruo òg. Kring 40 cm på flat mark, for så vidt ikkje all verda, men likevel, det gav ei ekstra utfordring for VfG måndag. Planen var å halda fram arbeidet i Høgåsen med underbygget. Men uheldig vis hadde ei hjelpande hand brøytt plassen framom Heishuset og palsert ein del av snøen ove skjenegangen. Dermed måtte rå handemakt til for å fjerna snøen slik at loket med arbeidsvogna kune ta turen inn i gruvegangen. Arbeidet tok si tid, då sporet endeleg var rydda, vart det ikkje tid å få gjort noko av arbeidet i gruvegangen.

Rune Marcussen med ryggen til og Thor Hauglid lempar snø ut av sporet.

Knut Inge Øien Hovin reinskar sporet for snø så loket ikkje skal spinna. Til høgre Torbjørn Marthinsen, til venstre Rune Marcussen, bakerst Ivar J. Helleland

Ivar J. Helleland skuvar på Geito opp den vesle stigninga til planovergangen. Lokførar Torbjørn Marthinsen

Sporet er rydda like til portalen i Høgåsen. Geito og Blåman vart kopla til tandemkøyring på det tunge føret. Alle bileta foto Tor Resser ©

Visekveld i Heishuset?

Det kan gå mot visekveld i Heishuset i Gruo. Ole Johnny Almås, som drog i gong Fest i Vest i Sagvåg, var måndag hjå Venelaget for Gruo og fortalde om tankar og idèar han har om å nytta Heishuset som konsertarena. Han tykkjer huset er spanande og eksotisk til denne typen bruk. Han syslar med planar om å få den svenske trubaduren Jack Vreeswijk, son til den legandirske visesongaren Cornelis Vreeswijk,  til Gruo 28. april. Saka er førebels på eit høgst førebuande stadium, men me skal koma  attende til saka når det er «meir kjøt på beinet».

Måndag 21. januar

Wilfred Sætre held fram med å panela togvognene. Sidene på den blå vart ferdig måndag. Arbeidet med å rehabilitera underbygget i Høgåsen gruvegang byrja så smått. Vinteren seinka arbeidet noko, då låsen til reiskapsbua var fròsen og måtte tinast. Inne i gruvegangen vart det grove ei lita veit frå kring midten av gangen ut til rennesteinen. Dragaren som var falle ned vart fjerna.

Ivar J. Helleland tiner låsen til reiskapsbua med varmepistol.

Ivar J. Helleland til venstre og Thor Hauglid grev veit ut til rennesteinen til høgre. I bakgrunnen Rune Johannessen. Båe bileta foto Tor Resser ©

I Heishuset avslutta Rune Marcussen og Knut Inge Øien Hovin abeidet med varmeomnane, mellom anna med å plukka ned stillaset.

Måndag 14. januar

Skjenegangen i Høgåsen gruvegang stoggar i dag ved eit underbygg. Årsaka til at skjenegange til no ikkje er lagt lenger, er at underbygget er så dårleg at det ikkje er forsvarleg å gå vidare med skjenegangen. Ei tid har det vore vurdert å rehabilitera underbygget og arbeidet tek til innan kort tid. Måndag var det synfaring til underbygget for å vurdera kva som skal gjerast. Underbygget er kring 5 meter langt. Først må det drenerast noko vatn. I gruvegangen ha VfG lagra stolpar som skal brukast til arbeidet.

Torbjørn Marthinsen ser kor dårlege stendarane som held dragaren, er. Det er særleg stendarane som må nye. I framgrunnen ein dragar som er falle ned då stendaren svikta.

I framgrunnen held Ivar J. Helleland målebandet medan Torbjørn Marthinsen til høgre les av kor mange meter underbygget er. Båe bileta foto Tor Resser ©

Elles måndag held Thor Hauglid fram med vedarbeidet, Wilfred Sætre panelte togvogna, ei langside og ei kortside er ferdig panelt. I Heishuset held Rune Marcussen og Knut Inge Øien Hovin fram sluttarbeide med å senka varmeomnane.

Måndag 7. januar

Godt nytt år til alle. Då e’da på’an igjen. Det vart full fart frå første stund. Arbeidet med å byggja om personvognene for toget er byrja. Då det på dei «nye» vognene vert flatt tak og høgare på sidene enn dei «gamle»,  vart det teke ei prøvekøyring inn i gruvegangen då det var mistanke om at det kunne verta trongt inn mot fjellet på venstre side. Det synte seg at eit stykke inne i gruvegangen, litt innanfor Høgåsen stasjon, vart det stogg. Opphenget som held det gamle luftrøyret kom i konflikt med taket. Ikkje så mykje, berre kring 5 cm. Dermed vert det litt endring i takrpofilen på vognenen. Fleire oppheng vidare innover var òg for nær skjenegangen. 

Torbjørn Marthinsen måler kor mykje av opphenget til det gamle luftrøyret kjem inn på det nye taket på vogna.

Wilfred Sætre byrja å panela eine sida på vogna.

I Heishuset vert dei åtte varmeomnane senka for å få utnytta varmen på ein betre måte. Det har synt seg at omnane ha hengt for høgt i rommet til å vera effektive.

Rune Marcussen til venstre og Knut Inge Øien Hovin monterer den siste av varmeomnane etter at wiren dei heng i, er senka til 3 meter ove golvet. Alle bileta foto Tor Resser ©

Thor Hauglid held fram med å kløyva ved.